Dende Ibuprofeno Teatro queremos desexarche boas festas e o mellor para o 2018

O pasado sábado 2 de decembro tivo lugar a primeira lectura do noso próximo espectáculo, 'Casa O'Rei' cos actores da montaxe. Un encontro para crear equipo e iniciar este proceso de traballo que culminará o 2 de marzo coa estrea en Vigo do espectáculo.

'Casa O'Rei' é un xogo escénico a partir de 'O Rei Lear' de Shakespeare interpretado por Miguel Borines, Victoria Teijeiro, Marián Bañobre, Teté García, Victor Mosqueira e Xosé Manuel Esperante baixo a dirección de Santiago Cortegoso. Con este espectáculo pechamos a nosa triloxía gastronómica -despois de 'O Furancho' e 'Raclette'-, e que mellor xeito de meternos en situación que facer a lectura nunha casa de xantar e comentar despois as nosas impresións e inquedanzas acompañados dun suculento cocido. 

Nesta edición Santiago Cortegoso será o encargado de dirixir a gravación das obras finalistas do concurso de Teatro Radiofónico do Diario Cultural. Santiago Cortegoso xunto a Marián Bañobre foi finalista deste premio en tres ocasións, acadando o recoñecemento do público pola súa peza "Intercom Baby" no ano 2012. 

O noso espectáculo RACLETTE é un dos selecionados para participar no "Circuito de la Red de Teatros Alternativos".

Realizaremos 15 funcións en 5 comunidades autónomas diferentes á nosa nos próximos catro meses.

Unha xira subvencionada polo INAEM e impulsada pola "Red de Teatros Alternativos" que pretende dar proxección a espectáculos contemporáneos de interese e favorecer a súa mobilidade por todo o estado.

O vindeiro xoves 15 de xuño, no marco da Feira de Teatro, Galicia Escena Pro, os membros de Ibuprofeno faremos a presentación oficial do que será a nosa nova produción: "Casa O'Rei. Traxicomedia Gastronómica".

Casa O'Rei vaise estrear en marzo de 2018.

Podedes ver a ficha de presentación do espectáculo seguindo este link da nosa web: 

http://www.ibuprofenoteatro.com/index.php/gl/producions/producions-en-cartel/item/casa-o-rei

A publicación das obras de Ibuprofeno Teatro; " A Filla de Woody Allen, Pequenos Actos Pseudorrevolucionarios e O Furancho", editadas por Morgante, é finalista na Gala do Libro Galego que se celebrará o vindeiro sábado día 20 de Maio no Teatro Principal de Santiago de Compostela. 

Santiago Cortegoso xa fora finalista na pasada edición destes premios pola publicación de Xeráis da súa obra " RACLETTE".

Toda a información sobre esta gala e os finalistas no link da web que aparece a continuación.

Chega o turno de competición Santiago Cortegoso no I Torneo de Dramaturxía organizado no Teatro Español. 

Nesta primeira fase o contrincante de Santiago será Ignacio del Moral.

Toda a información sobre o torneo, participantes, fases, etc... seguindo o link da web do Teatro Español que aparece a continuación

Vimos de saber que o noso espectáculo Raclette é finalista na XX Edición dos Premios Max de Teatro que organiza a Fundación Sgae, con dúas nominacións para Santiago Cortegoso. 

A gala dos premios Max terá lugar o vindeiro 5 de xuño no Palau de les Arts de Valencia.

Toda a información sobre os finalistas e os premios na súa web.

Non podemos estar máis contentos

O pasado mércores 29 de marzo, celebrábase no Teatro Rosalía Castro da Coruña a XXI Gala dos Premios María Casares de Galicia.

O espectáculo chegou aos premios como finalista en cinco categorías, entre elas mellor espectáculo e dirección.

Finalmente Santiago Cortegoso recolleu o premio a Mellor Texto Orixinal.

O pasado sábado 25 de marzo, nun acto para conmemorar o Dia Mundial do Teatro,  recibimos o Premio ao Mellor Espectáculo de Sala da Feira de Teatro de Ciudad Rodrigo 2016.

No acto celebrado no Teatro Nuevo Fernando Arrabal de Ciudad Rodrigo e despois da lectura da mensaxe redactada por Isabelle Huppert, representamos de novo Raclette.

Unha vez finalizada a representación , Santiago Cortegoso recolleu o premio entregado por representantes da Asociación de Amigos do Teatro e a Concelleira de Cultura da cidade.

A Comisión de Teatro e Circo da Rede é un grupo de traballo formado por programadores de distintos espazos escénicos asociados de todo o territorio nacional.
Ten como obxectivo principal aportar ao asociado información actualizada e de interese sobre os espectáculos do momento, contribuíndo a que os espazos dispoñan dunha programación equilibrada e de calidade.

Trimestralmente edita uns cadernos de espectáculos recomendados. Raclette foi incluído no último deles, publicado este mes de marzo de 2017.

Caderno de Espectáculos Recomendados marzo 2017

MELLOR ESPECTÁCULO

MELLOR DIRECCIÓN

MELLOR TEXTO ORIXINAL

MELLORES ACTORES: TONI SALGADO E SALVADOR DEL RIO

O pasado sábado 17 de decembro tiña lugar nas Bodegas Muga de Haro a Gala de entrega dos Premios Garnacha do XIX Certame de Teatro.

Ibuprofeno Teatro recibíamos alí a Mención Especial do Xurado pola nosa participación con RACLETTE no Certame. 

Agradecidos e encantados do cariño e o trato recibido por esas terras na que o viño e o teatro inundan a paisaxe.

Grazas a Haro e a toda a xente do Teatro Garnacha, un pracer.