Estamos xa inmersos nos ensaios da nosa nova montaxe 'Smoke on the water', un texto escrito e dirixido por Santiago Cortegoso e interpretado por Josito Porto (Ritchie), Belén Constenla (Janis), Adrián Rios (Alex), María Costas (Amparo e Joan Báez) e Mon Orencio (músico en directo). A montaxe prodúcese en Residencia Artística no Teatro Principal do Concello da Estrada e estrearase o 11 e o 12 de febreiro de 2022 no Pazo da Cultura de Narón

'Smoke on the water' é unha traxicomedia sórdida con música en directo que nos fala do fracaso e do inmobilismo a través de personaxes atrapados que por un ou outro motivo non son quen de cambiar e que por patéticos acaban resultando entrañables. O texto recibiu o Premio MOME Varela Buxán 2013. 

Completan o equipo artístico Carmela Bueno (axudantía de dirección e movemento escénico), Pablo Giráldez 'O Pastor' (espazo escénico), Salvador del Río (deseño de iluminación), Baia Fernández (caracterízación), Marián Bañobre (deseño de vestiario) e Diego Seixo (imaxe). 

IR Á PÁXINA DE SMOKE ON THE WATER

• A proposta foi seleccionada xunto a outras 39 entre as 1058 candidaturas presentadas

• A cita será o 25 de agosto no Espacio Afecir

Ibuprofeno Teatro estará presente este verán na Feira de Teatro Castilla y León Ciudad Rodrigo, que se celebrará do 24 ao 28 de agosto, coa montaxe 'O mel non caduca'. Entre as máis de mil propostas presentadas escolléronse 40 de compañías procedentes de Extremadura, Asturias, Cantabria, Galicia, Andalucía, Madrid, Comunidade Valenciana, País Vasco, Aragón, Cataluña e Portugal. De Galicia, xunto a 'O mel non caduca' de Ibuprofeno Teatro, foi seleccionado 'Premio' de La Quintana Teatro.

Na edición número 19 da Feira de Ciudad Rodrigo a compañía presentou 'Raclette', montaxe pola que recibiu unha mención especial ao Mellor Espectáculo de Sala.

Podes ver toda a programación AQUÍ

• O obradoiro será na Sala Roberto Vidal Bolaño de Compostela os días 25 de xuño e 2 e 9 de xullo en horario de 10 a 14 horas

• A matrícula é por orde de inscrición e está aberta até o venres 18 de xuño ás 13:30 horas

No obradoiro 'O vicio de estruturar o caos' Santiago Cortegoso proponnos explorar a escrita teatral a través do xogo. Xogar a que somos creadores sen límites: nin de orzamento, nin de tempo, nin de conciencia. Temos moitos folios en branco, todo un mundo do que falar e unha percepción da vida que nos individualiza. Trátase de explorar a nosa creatividade a través de como observamos o mundo, de como a través da nosa sensibilidade construímos unha visión particular do mundo porque precisamos ordenar o caos que nos rodea.

A oferta formativa do festival complétase cun curso de Dirección e Creación Escénica impartido por Tito Asorey, un curso de Iluminación impartido por Danial Pais e un Obradoiro de Performance e Creación Contemporánea impartido por Helena Salgueiro. Na páxina web do festival tedes toda a información de contidos, datas e prezos dos cursos, así como a programación e outras actividades complementarias. Podedes velo AQUÍ

Esta mañá presentamos dentro da sección pitching do Galicia Escena Pro a que será a nosa próxima produción: 'Smoke on the water', un espectáculo para público adulto con música en directo que mestura o humor negro coa crítica social. A obra prodúcese en Residencia Artística no Teatro Principal do Concello da Estrada e estrearase o 11 e o 12 de febreiro de 2022 no Pazo da Cultura de Narón.

O texto de Santiago Cortegoso, que recibiu o Premio MOME Varela Buxán 2013 e será editado (xunto con 'O mel non caduca') por Positivas, amósanos as viciadas relacións entre personaxes cun mundo interior complexo. Josito Porto (Ritchie), Belén Constenla (Janis), Adrián Ríos (Alex) e María Costas (Amparo e Joan Báez) dan vida a este grupo de seres humanos degradados, frustrados, fracasados e perdedores que provocan tenrura e compaixón. Xunto a eles estará en escena o músico Mon Orencio (que asina tamén o espazo sonoro). Completan o equipo artístico Carmela Bueno (axudantía de dirección e movemento escénico), Pablo Giráldez 'O Pastor' (espazo escénico), Salvador del Río (deseño de iluminación), Baia Fernández (caracterízación) e Marían Bañobre no deseño de vestiario e Santiago Cortegoso na dirección.

Na sección de espectáculos en cartel da nosa web tes información dispoñible que iremos completando con imaxes, vídeos e outro material segundo vaia avanzando a produción. Ir a páxina de 'Smoke on the water'

'O mel non caduca' poderá verse en streaming dentro do programa da Deputación de Pontevedra 'Prendendo Butacas na casa'. A emisión será o sábado 26 de decembro e estará dispoñible durante 24 horas. Prendendo butacas na casa é a adaptación ao formato dixital do programa de exhibición teatral Prendendo butacas, esta adaptación xorde por mor do avance da pandemia e como un xeito de garantir que esta teña un menor impacto no sector cultural.

O programa pon a disposición do público oito obras teatrais dende o 24 de decembro ao 3 de xaneiro, cada unha delas poderá visionarse durante 24 horas. Ademais de 'O mel non caduca' poderán verse: 'Rosalía' de Cooperactiva, 'Camiños' de ButacaZero, 'Afterparty' de A Feroz, 'Fíos' de Baobab Teatro, 'A maleta de Don Attilio' de Viravolta Títeres, 'A Galiña Azul' de Títeres Tanxarina e 'Os tres porquiños' de EducaTeatro Producións.

+info: https://www.depo.gal/prendendo-butacas-na-casa

A proposta escénica de 'O mel non caduca' xérase a partir a colmeas e outro material de apicultura que en boa parte foi cedido por produtores locais. Na escena da imaxe o personaxe de Avelino desfai un cadro usado (con cera) nunha escena que fala da forza do natural e de que antes ou despois a natureza acabará abríndose paso e ocupando o lugar que lle corresponde.

Estes cadros son de verdade, non é un truco, non é plástico, de feito conservámolos en frío para que non se deterioren. Queremos agradecer a Apigal a súa colaboración co espectáculo ao cedernos de xeito desinteresado este material (que xa antes nos facilitaron O mel de Manuela , Apiyago e o propio Avelino González que ademais de actor é apicultor). Apigal é unha empresa que traballa dende o rural de Porto do Son e produce de xeito natural mel, xelea real, polen e outros produtos apícolas. Tedes máis información nas súas redes sociais e na súa web: apigal.com

Detrás dese cadro están estes pequenos produtores que co seu facer contribúen a recuperar os ciclos naturais e a paliar o impacto negativo do consumismo. Non podemos estar máis orgullosos da súa colaboración e do seu apoio. Grazas!!

Debido ás medidas que se están levando a cabo para frear a propagación do covid-19 quedan aprazadas as funcións de 'O mel non caduca' do 13 de marzo en Boiro, 14 de marzo no Festival Miguel Torga de Mondim de Basto (Portugal) e 20 de marzo en Vigo. Aprázase tamén a función de 'Casa O'Rei' dentro da Mostra de Teatro Clásico de Lugo prevista para o 19 de marzo.

Iremos anunciando as datas de reubicación destas funcións a través da nosa web e das nosas redes sociais. 

Despois da pre-estrea o venres 24 de xaneiro no Auditorio Municipal de Catoira (20:00 horas) o vindeiro venres 31 de xaneiro e sábado 1 de febreiro (20:30 h) estreamos 'O mel non caduca' no Teatro Principal de Compostela.

'O mel non caduca' é un espectáculo arredor da obsolescencia programada, da relación do ser humano cos obxectos e da degradación do planeta por mor da perversa lóxica capitalista. É unha obra para emocionar e concienciar e tamén para rir e emocionar, 'hai moita ironía e moito humor no espectáculo, un humor reflexivo e crítico, por veces surrealistas e moi relacionado co universo do clown. Rímonos principalmente de nós mesmos e cuestionámonos como puidemos, como sociedade, ter chegado até aquí', afirma Cortegoso.

Do 22 ao 24 de xullo Marián Bañobre e Santiago Cortegoso impartirán un Obradoiro de Creación Escénica na MIT de Ribadavia, organizado pola propia mostra e a Asociación de Actores e Actrices de Galicia.

A meta do obradoiro é amosar e reproducir a pequena escala o método de creación da compañía. A dinámica consiste nun proceso de investigación e descubrimento a partir dun tema e dun espazo concreto. Esta forma de traballar parte da premisa de que os actores e actrices son os auténticos creadores.

A inscrición está aberta ata o vindeiro 8 de xullo. Toda a información AQUÍ

Onte déronse a coñecer os espectáculos finalistas nos XXIII Premios de Teatro María Casares e Casa O'Rei está seleccionado en catro categorías: actor principal (Miguel Borines), actriz secundaria (Marián Bañobre), texto orixinal (Santiago Cortegoso) e música orixinal (Alonso Caxade).

Doce son os espectáculos que competirán nas distintas categorías desta edición, os gañadores daranse a coñecer nunha gala que se celebrará no Teatro Rosalía Castro da Coruña.

Podedes ver a listaxe completa dos finalistas AQUI

Recentemente déronse a coñecer os candidatos da 22ª edición dos Premios Max e Casa O'Rei foi seleccionado en cinco categorías: espectáculo teatral, adaptación e dirección de escena para Santiago Cortegoso, deseño de espazo escénico para Pablo Giráldez 'Pastor' e actor protagonista para Miguel Borines.

Despois desta primeira fase un tribunal, formado polos tres presidentes dos xurados territoriais, catro persoeiros das artes escénicas e un membro do comité organizador, será o encargado de decidir os finalistas desta edición.

Ábrese tamén o prazo para votar o Mellor Espectáculo do Público, pode facerse a través da web dos Premios Max. Pincha AQUÍ para votar.

Pincha AQUÍ para consultar o listado completo de candidatos

A obra ‘Casa O’Rei’ recibiu o pasado sábado 15 de decembro o Premio á Mellor Montaxe (escenografía, vestiario, luz e espazo escénico) no Certame de Teatro Garnacha de Rioja Haro 2018. O espectáculo gañador desta edición foi ‘Duelo a muerte del Marqués de Pickman’ de Fundición Producciones, mentres que ‘El Bodorrio’ de Hika Teatroa fíxose co segundo premio.

Podes consultar a lista completa de gañadores aquí.

Xa temos preparado o merchandising de 'Casa O'Rei', montaxe que estrearemos o vindeiro venres 2 de marzo no Auditorio Municipal de Vigo: Camisetas, bolsas, delantais e chapas. Por suposto tamén teremos dispoñible o texto da obra editado por Rinoceronte. 

Poderase adquirir en todas as funcións da xira, que podedes ver aquí, ou poñéndose en contacto con nós a través do enderezo electrónico: Este enderezo de correo está a ser protexido dos robots de correo lixo. Precisa activar o JavaScript para velo. ou do noso facebook @IbuprofenoTeatro

O vindeiro 2 de marzo estreamos no Auditorio Municipal de Vigo 'Casa O'Rei'. A montaxe permanecerá na cidade olívica un día máis antes de visitar outras dez localidades na súa xira de presentación que remata o 26 de maio no Auditorio Municipal de Vilagarcía. Namentres tamén se poderá ver no Milladoiro, Ourense, Carballo, Santiago, Oleiros, Cangas, Pontevedra, Arteixo e Noia.