Comezamos os ensaios de 'Smoke on the water'

Comezamos os ensaios de 'Smoke on the water'

Estamos xa inmersos nos ensaios da nosa nova montaxe 'Smoke on the water', un texto escrito e dirixido por Santiago Cortegoso e interpretado por Josito Porto (Ritchie), Belén Constenla (Janis), Adrián Rios (Alex), María Costas (Amparo e Joan Báez) e Mon Orencio (músico en directo). A montaxe prodúcese en Residencia Artística no Teatro Principal do Concello da Estrada e estrearase o 11 e o 12 de febreiro de 2022 no Pazo da Cultura de Narón

'Smoke on the water' é unha traxicomedia sórdida con música en directo que nos fala do fracaso e do inmobilismo a través de personaxes atrapados que por un ou outro motivo non son quen de cambiar e que por patéticos acaban resultando entrañables. O texto recibiu o Premio MOME Varela Buxán 2013. 

Completan o equipo artístico Carmela Bueno (axudantía de dirección e movemento escénico), Pablo Giráldez 'O Pastor' (espazo escénico), Salvador del Río (deseño de iluminación), Baia Fernández (caracterízación), Marián Bañobre (deseño de vestiario) e Diego Seixo (imaxe). 

IR Á PÁXINA DE SMOKE ON THE WATER

Continuar lendo

'O mel non caduca' na Feira de Teatro Castilla y León Ciudad Rodrigo

'O mel non caduca' na Feira de Teatro Castilla y León Ciudad Rodrigo
  • A proposta foi seleccionada xunto a outras 39 entre as 1058 candidaturas presentadas
  • A cita será o 25 de agosto no Espacio Afecir

Ibuprofeno Teatro estará presente este verán na Feira de Teatro Castilla y León Ciudad Rodrigo, que se celebrará do 24 ao 28 de agosto, coa montaxe 'O mel non caduca'. Entre as máis de mil propostas presentadas escolléronse 40 de compañías procedentes de Extremadura, Asturias, Cantabria, Galicia, Andalucía, Madrid, Comunidade Valenciana, País Vasco, Aragón, Cataluña e Portugal. De Galicia, xunto a 'O mel non caduca' de Ibuprofeno Teatro, foi seleccionado 'Premio' de La Quintana Teatro.

Na edición número 19 da Feira de Ciudad Rodrigo a compañía presentou 'Raclette', montaxe pola que recibiu unha mención especial ao Mellor Espectáculo de Sala.

 

Podes ver toda a programación AQUÍ

Continuar lendo

Ibuprofeno Teatro participará no programa Cruzamentos de Camiño Escena Norte nun proxecto conxunto coas compañías asturianas Saltantes Teatro e Luz de Gas

Ibuprofeno Teatro participará no programa Cruzamentos de Camiño Escena Norte nun proxecto conxunto coas compañías asturianas Saltantes Teatro e Luz de Gas
  • O proxecto 'Tejiendo cordura con hebras de locura' foi seleccionado dentro do espazo de residencias e intercambio entre compañías Cruzamentos do programa Camiño Escena Norte 

  • A residencia terá lugar en agosto no espazo xixonés La Laboral e explorará a escrita dramática a través dun obradoiro impartido por Santiago Cortegoso

Ibuprofeno Teatro participará no programa Cruzamentos de Camiño Escena Norte nunha proposta conxunta coas compañías asturianas Saltantes Teatro e Luz de Gas para profundar na escrita dramática. A residencia será en agosto en La Laboral Ciudad de la Cultura (Xixón) e ten como base un obradoiro impartido por Santiago Cortegoso. 

O proxecto de residencia levarase a cabo en dúas fases: unha primeira, que terá lugar en agosto, e na que Santiago Cortegoso traballará cos integrantes de Saltantes Teatro e Luz de Gas para explorar a escrita dramática a través de dinámicas prácticas. Proporanse xogos de escrita individual e grupal a partir da dicotomía locura vs cordura co obxectivo de xerar material textual para a escena. Na segunda fase, que se realizará, entre setembro e novembro Saltantes Teatro e Luz de Gas traballarán na concepción dunha lectura dramatizada a partir dos textos resultantes do traballo previo con Cortegoso.

O obxectivo do programa Cruzamentos é promover a creación, investigación e formación escénica; así como o coñecemento e a apertura de vías de intercambio e cooperación entre as compañías das catro comunidades autónomas que están dentro do Camiño Escena Norte (Asturias, Cantabria, Galicia e País Vasco).

Na edición de 2021 desenvólvense catro residencias (unha en cada comunidade autónoma). No caso de Galicia, ademais de Ibuprofeno Teatro, foron seleccionadas las compañías Licenciada Sotelo, Caramuxo Teatro e Pedras de Cartón.

Tedes toda a información dispoñible na web de CAMIÑO ESCENA NORTE

Continuar lendo

Santiago Cortegoso imparte un curso de escrita teatral no Festival USCénica

Santiago Cortegoso imparte un curso de escrita teatral no Festival USCénica

 

  • O obradoiro será na Sala Roberto Vidal Bolaño de Compostela os días 25 de xuño e 2 e 9 de xullo en horario de 10 a 14 horas
  • A matrícula é por orde de inscrición e está aberta até o venres 18 de xuño ás 13:30 horas

No obradoiro 'O vicio de estruturar o caos' Santiago Cortegoso proponnos explorar a escrita teatral a través do xogo. Xogar a que somos creadores sen límites: nin de orzamento, nin de tempo, nin de conciencia. Temos moitos folios en branco, todo un mundo do que falar e unha percepción da vida que nos individualiza. Trátase de explorar a nosa creatividade a través de como observamos o mundo, de como a través da nosa sensibilidade construímos unha visión particular do mundo porque precisamos ordenar o caos que nos rodea.

A oferta formativa do festival complétase cun curso de Dirección e Creación Escénica impartido por Tito Asorey, un curso de Iluminación impartido por Danial Pais e un Obradoiro de Performance e Creación Contemporánea impartido por Helena Salgueiro. Na páxina web do festival tedes toda a información de contidos, datas e prezos dos cursos, así como a programación e outras actividades complementarias. Podedes velo AQUÍ

Continuar lendo

Novo proxecto: Smoke on the water

Novo proxecto: Smoke on the water

Esta mañá presentamos dentro da sección pitching do Galicia Escena Pro a que será a nosa próxima produción: 'Smoke on the water', un espectáculo para público adulto con música en directo que mestura o humor negro coa crítica social. A obra prodúcese en Residencia Artística no Teatro Principal do Concello da Estrada e estrearase o 11 e o 12 de febreiro de 2022 no Pazo da Cultura de Narón.

O texto de Santiago Cortegoso, que recibiu o Premio MOME Varela Buxán 2013 e será editado (xunto con 'O mel non caduca') por Positivas, amósanos as viciadas relacións entre personaxes cun mundo interior complexo. Josito Porto (Ritchie), Belén Constenla (Janis), Adrián Ríos (Alex) e María Costas (Amparo e Joan Báez) dan vida a este grupo de seres humanos degradados, frustrados, fracasados e perdedores que provocan tenrura e compaixón. Xunto a eles estará en escena o músico Mon Orencio (que asina tamén o espazo sonoro). Completan o equipo artístico Carmela Bueno (axudantía de dirección e movemento escénico), Pablo Giráldez 'O Pastor' (espazo escénico), Salvador del Río (deseño de iluminación), Baia Fernández (caracterízación) e Marían Bañobre no deseño de vestiario e Santiago Cortegoso na dirección.

Na sección de espectáculos en cartel da nosa web tes información dispoñible que iremos completando con imaxes, vídeos e outro material segundo vaia avanzando a produción. Ir a páxina de 'Smoke on the water'

Continuar lendo

'O mel non caduca' no programa Prendendo butacas na casa da Deputación de Pontevedra

 'O mel non caduca' no programa Prendendo butacas na casa da Deputación de Pontevedra

'O mel non caduca' poderá verse en streaming dentro do programa da Deputación de Pontevedra 'Prendendo Butacas na casa'. A emisión será o sábado 26 de decembro e estará dispoñible durante 24 horas. Prendendo butacas na casa é a adaptación ao formato dixital do programa de exhibición teatral Prendendo butacas, esta adaptación xorde por mor do avance da pandemia e como un xeito de garantir que esta teña un menor impacto no sector cultural.

O programa pon a disposición do público oito obras teatrais dende o 24 de decembro ao 3 de xaneiro, cada unha delas poderá visionarse durante 24 horas. Ademais de 'O mel non caduca' poderán verse: 'Rosalía' de Cooperactiva, 'Camiños' de ButacaZero, 'Afterparty' de A Feroz, 'Fíos' de Baobab Teatro, 'A maleta de Don Attilio' de Viravolta Títeres, 'A Galiña Azul' de Títeres Tanxarina e 'Os tres porquiños' de EducaTeatro Producións.

 

+info: https://www.depo.gal/prendendo-butacas-na-casa

 

Continuar lendo

Apigal pasa a formar parte dos colaboradores de 'O mel non caduca'

Apigal pasa a formar parte dos colaboradores de 'O mel non caduca'

A proposta escénica de 'O mel non caduca' xérase a partir a colmeas e outro material de apicultura que en boa parte foi cedido por produtores locais. Na escena da imaxe o personaxe de Avelino desfai un cadro usado (con cera) nunha escena que fala da forza do natural e de que antes ou despois a natureza acabará abríndose paso e ocupando o lugar que lle corresponde.

Estes cadros son de verdade, non é un truco, non é plástico, de feito conservámolos en frío para que non se deterioren. Queremos agradecer a Apigal a súa colaboración co espectáculo ao cedernos de xeito desinteresado este material (que xa antes nos facilitaron O mel de Manuela , Apiyago e o propio Avelino González que ademais de actor é apicultor). Apigal é unha empresa que traballa dende o rural de Porto do Son e produce de xeito natural mel, xelea real, polen e outros produtos apícolas. Tedes máis información nas súas redes sociais e na súa web: apigal.com

Detrás dese cadro están estes pequenos produtores que co seu facer contribúen a recuperar os ciclos naturais e a paliar o impacto negativo do consumismo. Non podemos estar máis orgullosos da súa colaboración e do seu apoio. Grazas!!

Continuar lendo

Avelino González recibe o Premio Dorotea Bárcena ao Mellor Actor

Avelino González recibe o Premio Dorotea Bárcena ao Mellor Actor

O noso compañeiro Avelino González vén de recibir o Premio ao Mellor Actor no Festival de Teatro Galego Celso Parada. O festival do Carballiño celebraba este ano a súa 31ª edición que pechou coa Gala de Entrega dos Premios Dorotea Bárcena. 

O xurado destacou o traballo interpretativo que o actor vigués leva a cabo na montaxe 'O mel non caduca', outorgándolle o Premio Dorotea Bárcena ao Mellor Actor. 

+info sobre O mel non caduca

[A fotografía foi cedida polo Festival de Teatro Galego Celso Parada e realizada por Gf-studio] 

 

Continuar lendo

Aprazadas as próximas funcións

Debido ás medidas que se están levando a cabo para frear a propagación do covid-19 quedan aprazadas as funcións de 'O mel non caduca' do 13 de marzo en Boiro, 14 de marzo no Festival Miguel Torga de Mondim de Basto (Portugal) e 20 de marzo en Vigo. Aprázase tamén a función de 'Casa O'Rei' dentro da Mostra de Teatro Clásico de Lugo prevista para o 19 de marzo.

Iremos anunciando as datas de reubicación destas funcións a través da nosa web e das nosas redes sociais. 

Continuar lendo

Estrea de 'O mel non caduca'

O venres 31 de xaneiro e sábado 1 de febreiro no Teatro Principal de Compostela

Estrea de 'O mel non caduca'

Despois da pre-estrea o venres 24 de xaneiro no Auditorio Municipal de Catoira (20:00 horas) o vindeiro venres 31 de xaneiro e sábado 1 de febreiro (20:30 h) estreamos 'O mel non caduca' no Teatro Principal de Compostela.

'O mel non caduca' é un espectáculo arredor da obsolescencia programada, da relación do ser humano cos obxectos e da degradación do planeta por mor da perversa lóxica capitalista. É unha obra para emocionar e concienciar e tamén para rir e emocionar, 'hai moita ironía e moito humor no espectáculo, un humor reflexivo e crítico, por veces surrealistas e moi relacionado co universo do clown. Rímonos principalmente de nós mesmos e cuestionámonos como puidemos, como sociedade, ter chegado até aquí', afirma Cortegoso.

 

Continuar lendo

Obradoiro de Creación Escénica en Cariño

Obradoiro de Creación Escénica en Cariño

Do 12 ao 14 de agosto Marián Bañobre e Santiago Cortegoso impartirán un Obradoiro de Creación Escénica no Auditorio Municipal de Cariño no que amosarán e reproducirán a pequena escala o proceso creativo da compañía. 

O prazo de inscrición, que se deberá realizar de xeito presencial na Casa do Concello de Cariño (Avenida da Paz, 2), estará aberto dende o vindeiro luns 29 de xullo ata o xoves 8 de agosto. A inscrición é de balde e hai dispoñibles 15 prazas para maiores de 16 anos. 

Para calquera consulta podedes dirixirvos ao Concello de Cariño a través do teléfono 981 405 064 ou do enderezo electrónico Este enderezo de correo está a ser protexido dos robots de correo lixo. Precisa activar o JavaScript para velo. 

 

Continuar lendo

Compagnie du Velours estrea 'Raclette' en francés

Do 17 ao 26 de xullo no OFF de Avignon

Compagnie du Velours estrea 'Raclette' en francés

Do 17 ao 26 de xullo a compañía francesa Compagnie du Velours presenta na sección off do Festival de Avignon unha versión francesa de 'Raclette' de Santiago Cortegoso. A cita será no Théâtre le Vieux Balancier da vila francesa. 

Silvia Rodríguez Abal dirixe a peza que protagoniza xunto a Fabien Crémière, Lucie Le Bras, Adeline Messiaen e Pierre Touvet. 

+info: https://www.avignonleoff.com/programme/2019/raclette-s26681/

Continuar lendo

Obradoiro de Creación Escénica na MIT de Ribadavia

Obradoiro de Creación Escénica na MIT de Ribadavia

Do 22 ao 24 de xullo Marián Bañobre e Santiago Cortegoso impartirán un Obradoiro de Creación Escénica na MIT de Ribadavia, organizado pola propia mostra e a Asociación de Actores e Actrices de Galicia.

A meta do obradoiro é amosar e reproducir a pequena escala o método de creación da compañía. A dinámica consiste nun proceso de investigación e descubrimento a partir dun tema e dun espazo concreto. Esta forma de traballar parte da premisa de que os actores e actrices son os auténticos creadores.

A inscrición está aberta ata o vindeiro 8 de xullo. Toda a información AQUÍ

Continuar lendo

Entrevista a Marián Bañobre na Guía Cultural de Ferrol

Entrevista a Marián Bañobre na Guía Cultural de Ferrol

O número de marzo de Aí – guía de cultura, servizos e ocio de Ferrolterra -abre cunha entrevista a Marián Bañobre na que se repasa a súa traxectoria profesional dentro e fóra de Ibuprofeno Teatro.

Podedes atopar, ademais, toda a actualidade cultural da comarca de Ferrol: teatro, cine, música, conferencias... unha completa guía para non perder nada.

Podes ver o número completo AQUÍ

Continuar lendo